ہیں جلوہ فرما مرے غمگسار طیبہ میں

*ہیں  جلوہ   فرما   مرے  غمگسار   طیبہ میں*
*اسی   لئے  تو   ہے  ہر  سو  نکھار   طیبہ میں*

*نبی نے خوشیوں سے دامن کو بھر دیا اس دم*
*ہوئی   جو    آنکھ   مری   اشکبار  طیبہ  میں*

*اسی  پہ حق  ہے  یہ جنت بھی ہو گئی واجب*
*جو   دیکھ   آیا    نبی   کا   مزار    طیبہ  میں*

*خدا  کے  فضل سے جاکر یہ میں نے دیکھا ہے*
*ہے  سب   سے  اعلیٰ   یقیناً   دیار   طیبہ میں*

*جو   بے   قرار  ہے   دنیا  میں  بات  مان  مری*
*چلو   ملے  گا   تمہیں  بھی  قرار  طیبہ  میں*

*حضور  میری  ہے  خواہش  دکھا  دو  در  اپنا*
*بس   ایک   بار    نہیں   بار    بار   طیبہ  میں*

*رسول   پاک   کا   مسکن   ہے   اس  لئے  واللہ*
*سمٹ   کے    آگئی   ساری   بہار   طیبہ   میں*

*تڑپ  رہے  تھے  ہر  اک  لمحہ  ہند میں رہ  کر*
*سکون   دل  کو   ملا   آ   کے   یار طیبہ  میں*

*انھیں  کہیں   سے   بھی  آواز   دو نظامی تم*
*سنیں   گے   آقا    تمہاری    پکار   طیبہ   میں*

ازقلم ــــــــــــــــــــ
امیر حمزہ نظامی رانچوی